Kau Toketa

Ko e GP ‘oku fa’a hoko ia ko e ‘uluaki tokotaha ngaue fakamo’ui ‘oku totonu ke ke sio ki ai kapau ‘oku ke ongo’i puke. ‘Oku nau ‘oatu ‘a e fale‘i ki he mo‘ui leleí, faito‘o, ‘oatu ‘a e sivi ki he mo‘ui leleí, pea ‘ave koe ki ha toketā mataotao pe falemahaki kapau ‘oku fiema‘u.

‘Oku lelei ma’u pe ke te ngaue’aki ‘a e toketaa GP tatau he te nau lava ai ‘o mahino’i lelei ‘a e tukunga ‘o ho’o mo’ui fakasino mo ha ngaahi palopalema ‘oku ke fekuki mo ia.

Kapau te ke fiema’u ha’o fo’i’akau, ‘e lava ‘e ho’o GP ‘o ‘atu ha’o la’i tohi ‘ota faito’o. ‘Oku ‘i ai ‘a e ngaahi fo’i ‘akau ‘e ni’ihi, ‘o hange ko e ‘enitipaiotiki, ‘e fiema’u ia ha la’i tohi ‘ota mei he toketa. ‘E fiema’u leva ke ke ‘ave ‘a e la’i tohi ‘ota faito’o ki he kemisi ‘o ke fakatau mei ai.

Kapau ‘oku ‘i ai ha’o kaati Medicare pea ko ho’o toketa GP ‘oku bulk bills (tohi mo’ua), ‘e ta’etotongi pe ‘a ho’o sio toketa. Kapau ko ho’o GP ‘ikai tohi mo’ua, ‘e fiema’u koe ke ke totongi ha konga pe koe kotoa ‘o hono fakamole.

Ko e ni’ihi ‘o e ngaahi GPs ‘oku nau ‘atu ha ngaahi sevesi ma’ama’a ange, pe ko hano totongi ‘e ho’o ‘inisiua mo’ui palaiveti pe Overseas Student Health Cover ‘a ho’o totongi sio toketa.

Vakai’i ma’u pe kimu’a ke ke ‘ilo pe ‘oku fiema’u ke ke totongi ‘a ho’o sio toketa GP pea ke toki puka ‘a ho’o ‘apoinimeni.

Ko e Sipesalisi ko ha kau toketa ‘a ia kuo ‘osi teu’i mo ako’i ke nau tokanga’i mo faito’o ‘a e kakai ‘oku nau fekuki mo ha ngaahi faingata’a’ia fakasino mahehe. Mahalo pe ‘e fokotu’u atu ‘e ho’o toketaa ke ke sio ki ha sipesalisi ‘o kapau te ke fiema’u ha toe ngaahi sivi pe ko ha tokanga’i/faito’o ‘e ha sipesalisi.

Fakatataa, ki ha palopalema ‘o e mafu mahalo ‘e fiema’u ke ke sio ki ha toketa mafu (cardiologist) Ke ke sio ki ha toketaa sipesalisi, kuo pau ke ‘i ai ha’o tohi fakafe’iloaki mei ho’o toketa fakafamili (GP) pea kuo pau foki ke puka ha’o ‘apoinimeni.

Ko hono totongi ko ia ‘o e sio sipesalisi ‘e malava pe ke fu’u mamafa ‘aupito. Mahalo pe na’a fiema’u ke totongi ‘e koe kinautolu neongo pe ‘oku ‘i ai ha’o kaati Medicare. ‘Oku ‘i ai foki e kau toketaa sipesalisi ‘e ni’ihi ‘oku nau ‘oatu ha ngaahi sevesi ‘e ki’i totongi ma’ulalo pe fakataha pea mo ho’o ‘inisiua mo’ui palaiveti.

Lomi’i heni ke kumi ha toketaa pe mataotao ‘oku fe’unga mo koe.